სასტუმრო "რედისონში" ქართულ-სლოვაკური ბიზნესფორუმი ჩატარდა ...

სასტუმრო "რედისონში" ქართულ-სლოვაკური ბიზნესფორუმი გაიმართა. ღონისძიება თბილისში ვიზიტად მყოფმა სლოვაკეთის საგარეო საქმეთა მინისტრმა მიროშლავ ლაჟჩაკმა და საქართველოს ეკონომიკური განვითარების მინისტრმა ზურაბ პოლოლიკაშვილმა გახსნეს. ზურაბ პოლოლიკაშვილმა სტუმრებს საქართველოში არსებული ეკონომიკური ვითარება და ქვეყნის საინვესტიციო შესაძლებლობები გააცნო. სლოვაკეთის საგარეო საქმეთა მინისტრმა სლოვაკური დელეგაციის საქართველოში ვიზიტის შესახებ გააკეთა მოხსენება და სლოვაკეთის ეკონომიკური პოტენციალის შესახებ ისაუბრა. საქართველოს ეკონომიკური განვითარების მინისტრის თქმით, ეს არის პირველი ქართულ-სლოვაკური ბიზნესფორუმი და გამომდინარე იქიდან, რომ სლოვაკეთი ევროკავშირის წევრი ქვეყანაა, ძალიან მნიშვნელოვანია სლოვაკურ და ქართულ ბიზნესკომპანიებს შორის ურთიერთობების გაღრმავება. "სლოვაკური კომპანიის მხრიდან უკვე გამოიხატა კონკრეტული ინტერესები სოფლის მეურნეობის, ტურიზმის და ასევე მშენებლობის სფეროებში. ვიმედოვნებ, რომ აღნიშნული ბიზნესფორუმი საქართველოში სლოვაკური კომპანიების მხრიდან კონკრეტული პროექტების განხორციელების დაწყებას და ქვეყნებს შორის ურთიერთობების გაღრმავებას შეუწყობს ხელს" - განაცხადა პოლოლიკაშვილმა. ბიზნესფორუმს სლოვაკური მხრიდან თოთხმეტი ბიზნესკომპანია ესწრებოდა სამშენებლო, ენერგეტიკული, სატელეკომუნიკაციო, ასევე მანქანათმშენებლობის, სატრანსპორტო, ტურიზმის და ეკონომიკის სხვა სფეროებიდან. ფორუმის დასრულების შემდეგ ქართულ და სლოვაკურ ბიზნესკომპანიებს შორის ორმხრივი შეხვედრები გაიმართა. სლოვაკეთსა და საქართველოს შორის სავაჭრო ბრუნვამ გასულ წელს 3 მლნ დოლარი შეადგინა. ბიზნესფორუმზე საქართველოს კონკრეტულ საინვესტიციო გარემოსთან დაკავშირებით პრეზენტაცია გააკეთა საქართველოს ეროვნული საინვესტიციო სააგენტოს დირექტორმა ირაკლი მატკავამ.

დაწვრილებით...

ლევან ვარშალომიძემ სასათბურე მეურნეობა "სენს სელექშენი" დაათვალიერა ...

კომპანია "სენს სელექშენი" ხელვაჩაურის რაიონის სოფელ გონიოში მდებარე 8 სათბურში იშვიათ ნატურალური ჯიშის სალათის ფურცლებს აწარმოებს. სასათბურე მეურნეობა 4500 კვადრატულ მეტრზეა განლაგებული. კომპანია ყოველდღიურად 50 კილოგრამ სალათის ფურცელს აწარმოებს.

"სენს სელექშენის" ძირითადი მომხმარებელი სასტუმროები, რესტორნები და სწრაფი კვების ობიექტებია. სამომავლოდ კომპანიის მიერ საცალო ბაზრის ათვისებაც იგეგმება.

სათბურის თანამშრომლებმა დღეს აჭარის მთავრობის თავმჯდომარისგან დაპირება მიიღეს კიდევ 10 ჰექტარი მიწის ნაკვეთის გადაცემის თაობაზე, ამასთანავე, კომპანიის რვავე თანამშრომელი კვალიფიკაციას ისრაელსა და ჰოლანდიაში აიმაღლებს.

დაწვრილებით...